Welcome to Shahd H. Rashed's Tea Party Blog

عافر لأخر نفس فيك

Updated: Oct 7, 2018



حبيت أتكلم عن دوامة الحياة؛ أنا من الناس اللي بحب أستغل كل الفرص اللي بتيجي قدامي و مش بحب أسيب أي فرصة للندم أنه يتملكني بسببها. يعني لو جات لي فرصة لازم استغلها للأخر و أتعب للأخر عشان لو كسبت يبقى توفيق ربنا و معاه مجهودي و لو خسرت يبقى عملت اللي عليا و حاولت على قد ما أقدر. بس لو محاولتش أصلا أكيد هيجي وقت و أقول يا ريتني؛ يا ريتني حاولت و ياريتني دخلت في كذا أو كان زماني عندي خبرة في كذا و كذا. و ﻷني بشوف أن الندم هو اسوء شئ على وجهه الأرض ف قررت أن الأستغلال للفرص هو الحل المثالي! مش أنا بس أظن في ناس كثير من بنات و ولاد جيلي بيحبوا أستغلال الفرص و التجربة و الخبرات و كل دا. يمكن دي سمات جيلي اللي طلع شاف أن لازم التعب؛ اللي عاش في ثروة و اللي شاف "يعني أيه تغيير؟"؛ اللي ببساطه عرف أن الحياه مش سهلة و لو متعبتش ملكش مكان. و كأن الحياة حلبة مصارعه؛ لو مركزتش هتتضرب و إحتمال تموت. لازم تصحصح و عقلك في راسك تعرف خلاصك. ممكن اطلع غلط؛ بس لحد دلوقتي أنا صح و نظريتي شغاله كويس جداً. صعب تشوف حواليك و تلاقي حد ناجح من غير مجهود و من غير خبرات و من غير فشل سلمه لفشل لحد ما نجح.


مش هحكي قصص ناس؛ و لكن أقرأ قصص الناس الناجحين اللي مش لازم يكونوا public figures و لكن ممكن جداً يكونوا زيي و زيك و عايشين حوالينا مش من ألاف السنين. يا ترى في حد ناجح من غير مجهود؟ اللي بيتعب بينجح و اللي بيتعب نص نص بينجح نص نص. يمكن دا تفكيري بسبب جامعتي اللي علمتني أن النتيجة على قد التعب؛ و يمكن زي ما قولت دي سمات الجيل أنه طلع على أن سوق العمل مليان ناس و أن "المشرحة مش ناقصه قتلى" و أننا لازم نتميز عشان يكون لنا مكان في البلد دي. يمكن عشان أنا بنت و أحنا متربين أن لو الولد بيتعب 24 قيراط البنت لازم تعبها يكون 48 قيراط عشان تثبت أنها قد المسؤوليه و تقدر تعافر في الحياة. مش عارفه سبب محدد بس النتيجه معروفه (على الأقل بالنسبه لي) تتعب تنجح!


أفتكر ان كل الشغل اللي عملته في حياتي كان بالصدفة و أستغلال الفرص و بس؛ يعني بحاول اعمل marketing لنفسي بشكل كويس عشان أقدر أشوف الفرص و أستغلها بشكل كويس. و دي دعوة مني لكل بنت و لكل ولد أستغلوا الفرص اللي في حياتكم على قد ما تقدروا و اتعبوا نفسكم على قد ما تقدروا و عافروا؛ عشان تطلعوا من الدنيا دي و أنتم كسبانين و سايبين علامه. يعني اتعلم و احضر events و اشتغل و اشترك في مسابقات و أتعب نفسك؛ حتى لو مكسبتش جايزه ف أنت كسبت تجربه. التجربه فوق التجربه هي اللي هتبنيك. و يوم ما تنجح و تسمع تشجيع الناس اللي تعرفهم و اللي متعرفهمش هتنسى التعب و تفتكر النجاح و بس.


المره اللي جايا لو حد طلب منك شغلانه و عرض عليك فرصة؛ أعملها بطيب خاطر. اشكر ربنا أنه حطك في المكان دا عشان اكيد هتتعلم حاجه أو أكثر من حاجه. الحياة كلها حاجات حلوة بس نستغلها ﻷخر فتفوته و نتعلم منها و نعافر فيها على قد ما نقدر. و مش معنى كلامي أنك تكون مدمن شغل لحد ما في يوم نقرأ أسمك في صفحة الوفيات؛ بس كلامي معناه ركز في حياتك. و بعد كل شوية تعب و معافره؛ خدلك أجازه بس متطولش فيها. 



©2018 by Shahd H. Rashed's Tea Party. Proudly created with Wix.com