ايه الفرق بين الحب والامتنان؟ اه هي الاسئلة الوجودية بتاعت الساعة 4 الفجر. مش متاكدة اذا كنت هعرف أُوصِّف معناه، بس لو مثلا فصصنهم عن بعض ف الامتنان هو اني اشعر اني ممتن لشخص على شئ، وممتن بمعني شاكر ومقدر جدا يعني في سبب ما وراء الشعور بالامتنان اما الحب فهو شئ غير مخطط، غير مرتب، في الأغلب بيبقى شئ عشوائي ملوش سبب مقنع وراءه، بس فيه تفاصيل محدش غير الطرفين نفسهم هما اللي يقدروا يحسوها ومش هقولك يوصفوها عشان في الأغلب لو حاولوا مش هيعرفوا، الامتنان والحب ملهمش علاقة ببعض، ساعات بيجوا مع بعض وساعات لا، شعورين مختلفين تماماً.
ممكن يختلطوا مع بعض؟
احتمال وارد جدا ممكن تحس انك بتحب حد لمجرد انك ممتنة للحاجات اللي بيعملها، واعتقد ان ده سبب نص الجوازات الفاشلة والخيانات، الشخص بيبقى عايز يقدم الحب من باب الامتنان تفتكروا الحب ملوش سبب؟ الحب في حد ذاته أكيد ملوش سبب واضح، ده احساس، الأسباب هي اللي بتخلي العلاقة تكمل او لا، هي اللي بتحدد القرارات اللي هتتاخد -ساعات بحس ان الحب مرتبط بالغضب -بمعني ان كل ما زاد الغضب وزدات المعاناة زاد الحب او قيمته؟ - مش شرط. في غضب ومعاناة محورها خبيث، محورها الشخص الغاضب، غاضب على صورته، غاضب لإنه غير مسيطر، غاضب لإنه ليس محور الكون بالنسبة للشخص الأخر -بس مش ده يبقى في نوع من انواع الانانية؟ والحب ابعد ما يكون عن الانانية -بالضبط، الحب ابعد ما يكون عن الأنانية. كون إننا نخدع نفسنا بوهم، في يوم هنقف قدام الحقيقة وندافع عواقب الاوهام دي كلّها، لكن الحب بيخلينا أفضل وأفضل بطريقة شاملة - بس ثانية في فرق ما بين إني عايز أكون "أنا وبس" في قلبك وعقلك لغرض الحب, وما بين إني أسيطر لأسباب شخصية آيا كانت -لان بعد ما كنت بتعمل كل حاجة لوحدك بقيت بتشارك شخص تاني بمحض إرادتك، تفتكر دي قناعات بنقنع نفسنا بيها عشان نحس ان احنا أفضل؟ والحب اصلا انانية ومحاولة للتملك؟ والحب ما هو الا وهم اختراعه الانسان عشان يبرر انه يمشي وراء راغبته زي ما محمود مرسي كان بيقول؟ الحب شئ مش دايما عقلك بيوافقك عليه، الامتنان شئ عقلك راضي جدا عنه. والأهم بقى من الحب، القرار. الحب لوحده بس كدة ده افلام ومسلسلات رومانسية شوية زايفة. في حاجة اسمها قرار ده اللي بيبقى واقف على نفس الخط مع الامتنان. السؤال الأهم، هل العلاقات اللي احنا فيها دي كلها مبنية على الحب الخالص؟ ولا الامتنان للأفعال؟